政情：余遠騁應徵副局等消息
世界自然基金會香港分會氣候項目主管余遠騁，早前去咗應徵做下屆環境局副局長，佢尋日出席一個環保領袖論壇時話，面試後至今都未收到進一步消息，亦無人叫佢去下一輪面試喎。
雖然余遠騁係咪獲聘任仲係未知之數，但佢尋日就賣口乖，大讚候任特首梁振英嘅環保政策，係集合咗各環保團體意見嘅智慧成果。唔知呢番話會否增加佢獲聘嘅機會呢？
世界自然基金會香港分會尋日同城市大學合辦咗一個環保領袖論壇，有份出席嘅余遠騁被記者追問應徵副局長嘅事，但佢就好口密，唔肯多講。
被問到環保團體對環保政策好進取，如果佢入到政府可能同政府起衝突，余遠騁就話，環保團體喺前線收集市民意見，又話新政府推行環保政策都會重視民意接受程度，所以認為唔會有矛盾和衝突，莫非佢暗示自己入政府無問題？