政情：CY被跣 應驗車公靈籤

被政界封為「夢熊大師」嘅全國政協委員劉夢熊，尋日就出嚟拆解呢個政治亂局，佢仲狠批前日喺表決優先處理新政府架構重組決議案上玩嘢嘅建制派議員「各懷鬼胎」。

立法會前日喺多位建制派議員「作反」下，令到提早審議新政府架構重組嘅決議被否決，候任特首梁振英（CY）七月上任，肯定要以「殘陣」應對挑戰，話「有志難伸」都不足為過。CY嘅忠實支持者劉夢熊都睇唔過眼，尋日接受訪問時就拆解呢個政治亂局，經佢一拆，大家即時通晒，講到底咪又係班建制派議員同現屆政府執包袱前玩嘢，各懷鬼胎，企圖一拍兩散囉。

轟謝偉俊為直選鋪路

夢熊大師話，對於立法會否決優先審議架構重組建議感到好遺憾，事件反映貪曾嘅夕陽政府未能配合新政府達至無縫交接，現屆政府無做好箍票工作，先會搞出咁嘅局面。大師點名批評幾位唔肯配合新政府嘅議員，包括向來唔鍾意CY嘅金融服務界議員詹培忠、早已預期會退位嘅體育、演藝、文化及出版界霍震霆及金融界李國寶，話佢哋唔會盡心盡力幫忙。

夢熊大師仲特別點名批評投反對票嘅旅遊界謝偉俊，話佢準備參加九龍東直選，需要站在道德高地，顯示獨立性。

不過，謝偉俊就否認投反對票同參選有關，只係重視程序公義喎。唔單止咁，大師仲話前日喺決議案否決後「Ｏ晒嘴」嘅政務司司長林瑞麟，橫豎都無得撈，所以對下屆政府嘅事抱住「不在其位，不謀其政」嘅心態，種種原因，終令CY當選後首度受挫。

講到底，建制派議員學人講立場或做逃兵，結果搞到人唔似人、鬼唔似鬼咁，完全係「神鬼如何兩不分」。CY前日被揭屋企有僭建物，夢熊大師就話，事件顯示CY「係人，唔係神」，公眾不能要求CY句句都係真理、事事正確喎。