中環出更：趙式和情迷真假老夫子
家喻戶曉嘅經典漫畫老夫子，已經陪伴港人半個世紀，卓妮早前預告過，老夫子第二代作者王澤會帶埋原稿畫作，喺名媛趙式和（Jane）旗下畫廊「錦藝舫」（Galerie Huit）展出，前日就喺灣仔和昌大押舉行開幕酒會，吸引唔少城中名流出席。除咗主角王澤外，Jane嘅夫婿李承康，家姐趙式明同堂妹趙式芝都去撐場，而名媛何明懿都有現身，現場氣氛好熱鬧。
作為搞手嘅Jane，憶述細個去學鋼琴，等候音樂導師期間靠睇漫畫打發時間，後來發現睇幽默詼諧嘅老夫子有助紓緩緊張情緒，結果就此成為老夫子嘅粉絲，咁耐以嚟每一期嘅漫畫都唔會錯過，就連籌辦婚禮佢都搵王澤嚟幫手畫畫添。
至於Jane嘅老公，就試過同兩位一高一矮嘅朋友企埋一齊，從而畀人冠以老夫子嘅綽號。
式芝讚爹哋比秦先生靚仔
原來Jane嘅堂妹趙式芝都係老夫子漫畫迷，話老夫子係佢嘅童年回憶，佢話去英國求學期間，都係靠老夫子嚟解悶。漫畫中咁多角色之中，式芝都係最鍾意老夫子，雖然秦先生外表較為俊朗，但係點睇都係佢爹哋靚仔啲喎。
以漫畫「十三點」聲名鵲起嘅漫畫家李惠珍，就話兩代嘅老夫子作者佢都認識，其中第一代作者王家禧係佢嘅前輩，不但畫功了得，連毛筆字亦相當優秀。至於第二代王澤，漫畫嘅筆觸跟老父幾乎一模一樣，十分難得，由此可見王澤不但繼承父親嘅藝術精神，仲係一個天才添。
主角王澤就對今次展覽好滿意，又大讚Jane嘅安排十分出色，仲話希望明年可以連同佢父親王家禧嘅老夫子原稿再搞多次展覽。
卓妮