查證居然剝光豬 踐踏人權全港輸

離譜!離晒大譜!查身份證啫,居然要剝光豬搜身,警權踐踏人權到咁離譜嘅程度,你估香港警察真係變咗國產公安咩!

警方投訴警察課向監警會提交嘅數字顯示,舊年警務人員被投訴涉及嘅三大範疇,依次係與交通有關事項、拘捕同截停搜查。監警會秘書長朱敏健指出,警員每年截查市民身份證嘅個案多達二百萬宗,近年有幾宗投訴係話,市民要求警員唔好喺街上檢查身份證,去到警署之後,查證變咗搜身,包括脫去上衣甚至全身剝光豬。如果警方有合理懷疑,最終又真係搜到違禁物品,咁就無話可說啫,可惡嘅係剝光豬搜完身之後全部無條件獲釋。

朱敏健講得啱呀,市民原本喺街上只須交出身份證,點解去到差館,懷疑會多咗呢?剝光豬搜身令到被截查嘅市民感到被戲弄,警方必須提出充分理據解釋。

冇錯嘞,麻煩警隊一哥禿鷹先生曾偉雄好好解釋,因乜事幹師兄師姐愈來愈兇神惡煞?點解經常唔將市民放在眼內?嗱,你唔好話香港回歸中國,再過幾日就慶回歸十五周年,所以警務人員行事作風都要中國化,踐踏人權更加要以祖國為師。假如禿鷹先生真係咁諗又真係咁答,功夫茶應承你,未到七一已經吹雞示威!

剝光豬搜身呢家嘢,針對殺人放火嘅悍匪大盜或者恐怖分子就話冇問題啫,依家講緊嘅係查身份證喎,完全冇必要咁大陣仗。大家唔好唔記得,警方對付示威者除咗利用胡椒噴霧玩顏射之外,間唔中都會拘捕示威者再剝光豬搜身,反映踐踏人權並唔係個別例子。

功夫茶不妨教精曾偉雄,醒你四粒字:官逼民反。人權一旦被踐踏到忍無可忍嘅時候,人民就會作反o架嘞,到時警方更加頭痕o架咋。即係咁,一個不尊重人權嘅社會,必然係一個危機四伏嘅社會。你睇下北非國家利比亞,又睇下獨裁狂人卡達菲嘅悽慘下場吖,呢個獨裁者極度不尊重人權,結果官逼民反,暴君死於非命,瓜柴之前仲要接受酷刑屁股開花。

簡單咁講,踐踏人權全港皆輸,百姓先輸尊嚴,惡霸後輸政權。

除咗查證居然剝光豬之外,警方拘捕疑犯嘅處理手法唔知好嬲定好笑。曾經有一名中醫師,目睹對面大廈發生劫案,走過去了解情況啦,警員單憑大廈管理員一句「好似係佢」,就將中醫師帶返警署剝光豬搜身,事後證實與案無關。點解管理員認為中醫師係賊呢?佢話「個賊同佢一樣都係講純正廣東話」。嘩,大佬呀,全香港絕大部分市民都能操流利廣東話o架啦,莫非警方要拉晒全人類?

總而言之,人權不可侵犯,警權不可氾濫!