貪曾搬竇，兩公婆搬離禮賓府嘅物品逾千箱，過千箱「家當」，搬到呯拎嘭呤，好似燒炮仗咁，本報出示嘅獨家搬竇圖，場面壯大，難怪公眾嘩然！俗語話齋，唔見隻白鴿，淨睇篤屎，都知隻鴿夠唔夠肥美、有幾多斤両喇！難怪「曾大屋」冇六、七千呎，真係擺唔落咁多「雜物」！
貪曾自詡為「政治家」，既然唔係哲學家，自然唔知道「洞穴」係哲學嘅意思。柏拉圖關於人的認知，有個著名的「洞穴」比喻，人們只看見物體在牆上虛幻斑駁的投影，走出去開了天眼又回來啟蒙他們的智者，反而不見容於穴居者，落了個飲鴆而亡的結局。
此外，尼采筆下嘅智者查拉圖斯特對洞穴情有獨鍾，佢雖然常到集巿去放風、採購和講學，然洞穴嗰份散發着魔力的幽暗和寧靜，顯然係佢沉思、禪定和修煉的不二之選。難怪武俠小說那些練就獨門武功嘅高手，多喺高崖穴洞或湖底監獄，鮮有在亮麗輝煌嘅豪宅！
之不過貪曾呢位「政治家」，點會體會「洞穴」嘅魔力，《太陽報》有專欄作者戲稱佢「萬箱搬得走，惟有業隨身」，確精警！南唐高僧文益有首「看牡丹」，可作「萬箱搬得走」嘅注釋：擁毳對芳叢，由來趣不同。髮從今日白，花是去年紅。艷色隨朝露，馨香逐晚風。何須待零落，然後始知空。
貪曾人未走茶已凍成霜，老朽無言以贈，只寄望佢勿小貪成隱、大貪成癖，否則變成蒼蠅鑽到蜂桶頭——求不到吃還要遭錐，那就該煨咯！