政情：孫公鑽研賽馬統計學
最近一年，教育局局長孫明揚先後患上腎衰竭同退伍軍人症，後來又跌斷手，所以睇見仲有九日就任滿，連立法會都唔使再去，孫公實在興奮得難以形容。九日後最想做乜？佢已經買定咗統計學嘅書，諗住結合過往對於跑馬投注模式嘅研究，鑽研跑馬嘅統計數字，真係夠晒特別。
孫公尋晚同傳媒餞別，精神好好，佢話早已計劃好退休後要過有紀律嘅生活，認為就算退咗休，都不能太hea，每日要驗血，檢測血糖、血壓、體重等，交功課畀醫生，諗住日後朝早係學習時間，午飯後至同啲「壞朋友」去hea吓。至於佢早前跌斷嘅手，已經康復得七七八八，就算打麻雀都可以反牌喇。佢仲換咗部新跑步機，打算多做運動。
今屆政府任滿後，相信香港嘅景點會多咗唔少訪客，孫公就好嚮往可以長者身份，免費去海洋公園玩，唔知佢喺海洋公園會唔會撞到啲前同事呢？