政情：嫻姐帶隊殺入「鼠竇」
工聯會嚟緊九月立法會選舉決定全面出擊，勢必參加超級區議會選舉嘅榮譽會長陳婉嫻，尋日特登拉埋盛傳會出選九龍西嘅副理事長周聯僑，同埋九龍城區議員黃潤昌落紅磡黃埔一帶擺街站。眾所周知，黃埔區一帶係同屬建制派專業會議立法會議員梁美芬（鼠王芬）嘅地盤，嫻姐帶隊踩落去，意味工聯會今鋪許勝不許敗。
周聯僑話，工聯會同鼠王芬票源唔同，相信唔會影響梁嘅選情：「梁美芬話工聯會上次無幫過佢，咁又點會搶到佢啲票呢？」講番尋日嫻姐一落到黃埔區，唔少街坊都即刻走埋去同佢傾偈，魅力不遜當年。嫻姐就表明已經準備就緒參選，但都要等工聯會七月通過參選名單先至公布。
對於工聯會前法律顧問鄺志堅應徵做下屆政府嘅勞工及福利局副局長，嫻姐就表明極度支持，又話如果真係請到鄺志堅呢類喺勞工界打滾多年嘅人做副局長嘅話，佢一定會讚新政府一聲「夠吉士」喎。