政情：爭超級議席 阿涂焗啃骨
民主黨（白鴿黨）早前忽然變陣，由原定派出一老一少、即現任立法會議員涂謹申（阿涂）同葵青區議員尹兆堅出戰超級區議會，改為派出兩隻老鴿、黨主席何俊仁（鐵頭仁）夥拍阿涂參選，希望可以力爭兩席，但隨即又爆出兩人分區大細超，地區黨友又唔肯配合等問題。喺鬼打鬼之下，連白鴿黨自己都估計喺五個超級議席中，泛民主派只能贏兩席，建制派可奪三席，打破多年來嘅「六四黃金定律」。
白鴿黨原先派出阿涂加尹兆堅出戰超級議席，係人都知道阿涂嘅勝算較高，甚至可以話係贏硬，但改為夥拍鐵頭仁之後，形勢就立即逆轉，各方都估計知名度較高嘅鐵頭仁，會吸走白鴿黨甚至全港泛民支持者嘅大部分選票，令阿涂嘅選情變得危危乎，隨時會輸畀只得一條名單參選超級議席嘅民協馮檢基。
分區拉票大細超
喺分區拉票安排方面，白鴿黨亦被指大細超，偏幫黨主席鐵頭仁。據聞該黨原定撥出人口較少嘅香港島同九龍東、西畀相對較強嘅阿涂拉票，人口較多嘅新界東、西就留畀尹兆堅，希望兩者得票會均勻啲。白鴿黨決定改派鐵頭仁出選後，雖然相應地將屬於新界東嘅北區及半個大埔區撥畀阿涂，希望將兩人嘅選區人口戥番勻，但眾所周知北區係白鴿黨最弱嘅其中一個區，大埔方面亦因前黨友鄭家富退黨而元氣大傷，計落阿涂其實無乜着數。
最慘嘅係，由於阿涂喺黨內嘅支持者同人緣，亦遠遠唔及鐵頭仁，據聞九龍西以外嘅部分地區黨友，對力撐阿涂參選超級議席反應冷淡。例如喺港島區街頭，至今都只見現任議員甘乃威及打算空降港島參選嘅副主席單仲偕嘅橫額，但就完全見唔到阿涂個樣；而鐵頭仁之前喺港島區掛開嘅部分橫額，更加到依家都未拆，令初為人父嘅阿涂最近周圍大叫救命，擔心會變失業爸爸。
如果白鴿黨喺變陣下都係贏唔到兩席超級，反而白白犧牲咗培育多年嘅阿涂及新入黨嘅尹兆堅，咁就真係自作孽囉！