中環出更：龐建貽開店 純官試菜撐場
鋼鐵大王龐鼎元孫兒龐建貽（Paulo）除咗係大亞洋酒創辦人外，近年仲積極開拓西餐市場，由首間喺中環開設嘅Classified，以至The Press Room、SML等等，半年前更喺灣仔開設摩登歐陸菜餐廳The Principal，攻佔港人味蕾。問佢外父鄭家純支唔支持佢做飲食業？Paulo就笑言，家人已去勻晒佢嘅餐廳試菜，你話支唔支持喇？
捨難取易搞西餐
Paulo尋日出席一個飲食界座談會時，分享佢初開業時遇到嘅難題，佢話唔少人都想喺飲食界上大展拳腳，但政府唔幫手之餘，仲喺發牌條例上諸多限制，批核程序又慢，搞到啲牌照遲遲未到手，成為創業最大嘅障礙，建議政府拆牆鬆綁。至於點解Paulo只做西餐廳，佢就笑謂香港有太多中餐高手，而西餐就仲有發展空間，所以捨難取易喎！
Paulo因工作關係經常周圍飛，可謂食盡珍饈百味，但佢話美食唔一定要貴，最緊要好食，好似鏞記燒鵝、麥奀記雲吞麵、九記牛腩，都係佢嘅「賣飛佛」。卓妮仲見到座談會搞手、食評《WOM guide》創辦人馮仕耕（Fergus），佢話自己為食程度爆燈，可以為咗一間餐廳而越洋過海喎。
卓妮