中環出更：龔嬿「花」心思 打造華麗盛宴
繽紛鮮花，最易打動女人心，百發百中。因為一份孝順，出身珠寶世家嘅龔嬿（Yvonne）就延續媽媽創立嘅鮮花裝飾生意，幾年間，承接唔少名人婚禮場地裝飾，時尚品牌Cartier、Chanel、Louis Vuitton（LV）等鮮花場地布置，都係搵呢位「鮮花公主」幫手。
樹葉砌出六呎巨熊
喺英國讀考古嘅Yvonne，從小在「花海」成長，媽媽喺中環開花店Rococo，佢小小年紀已穿梭大小喜宴，幫手布置場地。不過，佢嘅兄弟姊妹中，唔係會計師就係大律師，無意經營花店，Yvonne不忍心媽媽辛苦三十多年嘅心血就此結束，八年前就拍心口擔大旗，回港接掌家族生意，從見客、訂花、布置場地等，佢都係一腳踢。
不過，花店太子女遇上奄尖客人，一樣被罵至體無完膚。Yvonne自爆曾九十度彎腰向客人鞠躬道歉，但幸好辛苦耕耘下，已累積唔少名人客。多年來最難忘嘅，要數為客人喺酒店婚禮場地用樹葉砌出一個六呎高巨熊。
今年係婚嫁好年頭，定單接不停，搞到Yvonne連拍拖都無時間，唔少追求者眼見佢天天與花為伴，都唔敢送花表達愛意，Yvonne就甜笑話：「係女仔都鍾意驚喜，有人送花，我都冧o架！」
卓妮