熟悉功夫茶脾性嘅忠實讀者應該都知道，功夫茶最鍾意祝人身體健康，千叮萬囑叫大家唔好病，原因係香港嘅醫療系統實在太胡鬧嘞，胡鬧到隨時玩殘甚至玩死病人。家陣終於有一個好消息，食衞局局長周一嶽正式宣布唔會留任下屆政府，七月一日政府換屆之後醫療系統有機會敗部復活。
接替周一嶽嘅新局長到底係何方神聖呢？江湖盛傳係做過醫管局高層嘅骨科醫生高永文，呢一位疑似新局長接受本報專訪，開宗明義點出未來首要落墨處理嘅兩大核心問題。第一個核心問題係醫生工作時間太長，第二個核心問題係病人輪候時間太長。醫人嘅又做得長，被醫嘅又等得長，高永文一旦坐上食衞局局長寶座，當然要諗辦法將兩大核心問題由長變短，最好短過長腿美女嗰一條迷你裙。
講到呢度，有必要翻一翻舊帳。曾蔭權主政七年，話就話要打造醫療產業，點不知情況就好比打開「潘朵拉的盒子」一樣，乜鬼嘢禍患都湧晒出嚟，成個醫療系統亂到裙拉褲甩，顧得個頭又顧唔到隻髻，醫療失誤殺人如麻。最經典嘅禍患莫過於內地雙非孕婦來港產子，逼爆產房害到本地媽媽叫苦連天。一個貪威識食嘅曾蔭權，加上一個尸位素餐嘅周一嶽，坐以待斃之下，醫療系統變咗死症。如果唔係候任特首梁振英提出「雙非孕婦零配額」，呢個問題都唔知幾時解決。
所以話啫，今年七月一日確係一個良辰吉日，一來換特首，二來換局長，撥亂反正先至有希望。
好嘞，講番疑似新局長，高永文建議下屆政府首要改善醫護人員嘅工作環境，特別係改善連續工時長，較訂立標準工時更重要。醫生連續長時間工作，牽涉病人健康以及醫療安全。醫管局曾經要求醫生當值二十四小時之後放假，但係受制於人手不足而未能完全落實，高永文就話嘞：「係咪可以諗下其他方法，唔一定要加人手先至做到。」
到底係諗乜嘢方法呢？功夫茶暫時唔知高永文有何高見，唯一知道嘅就係，只要高永文唔係第二個周一嶽，徹底戒絕「周周孭一鑊」嘅壞習慣，解決問題嘅機會絕對存在。最低限度高永文識得話，醫療保險計劃、增建私家醫院甚至發展醫療產業都可以慢慢來，不急於一下子大堆頭出台。換言之，縮短醫生工作時間以及病人輪候時間係重中之重，唔似得周一鑊經年累月漠視問題。
無論如何，一句講晒，不撥亂難以反正。醫療系統亂咗咁耐，麻煩新官上任三把火，燒晒所有庸醫劣護，救晒一切疑難雜症，功德無量呀，老友！