政情：陳茂波替接班人掃地雷
準備喺七月離開立法會過檔新政府嘅會計界議員陳茂波（Paul），尋日特登帶接班人林智遠（Nelson）出嚟見記者，擺明係為Nelson入立法會鋪路。不過，阿Paul一走，會計界選情必定風起雲湧，幸好阿Paul負責做Nelson軍師，唔單只教路拉票，仲周圍打聽有乜人會出戰，刺探敵方軍情，掃除障礙。
好似早前會計界傳出，行會成員劉遵義老婆劉麥嘉軒有意出戰會計界，佢喺特首選委會以高姿態勝出，都咪話無機會。阿Paul聽到之後就好緊張，即時問劉太係咪嚟真，點知劉太就話無興趣做議員喎。就係咁，Nelson於是少咁個勁敵，但仍要面對可能會捲土重來嘅龔耀輝及泛民主派嘅梁繼昌爭位。
林智遠係「會計界黃子華」
雖然有陳師傅幫手掃地雷，但自己都要有實力打仗至得。現年四十四歲嘅Nelson就話自己有「會計界黃子華」嘅外號，啲人聽佢教書同講talk都唔會瞓覺，相信演講能力好過阿Paul，唔怕悶親選民喎。阿Paul就話，如果佢七月過檔新政府做官，佢個立法會議席就會自動喪失，所以毋須辭職同補選。