政情：橄欖衰多口險釀拉布
玩「拉布」並唔係泛民主派嘅專利，有時建制派都會不自覺下支持「拉布」。好似尋日財務委員會審議新政府架構重組，主席劉慧卿即席讀出公務員團體嘅意見書時，民建聯陳鑑林（橄欖）就無喇喇加把口，話卿姐淨係讀出其中一封信唔公平，應該讀埋其他團體嘅意見書喎。
民主黨李永達見到橄欖咁講，即刻話支持佢，仲叫卿姐讀埋其他團體嘅意見書，仲話讀晒都係三個幾鐘頭啫，夠晒公平。橄欖到呢刻先至意識到講錯嘢衰咗，因為讀意見書都要讀三個鐘，一定蒙上「拉布」嘅罪名，所以佢即時收番句說話，叫卿姐唔使讀喎。
橄欖之所以差啲中伏做咗「拉布」罪人，相信係因為佢最近做完手術，元氣未回復。話說上星期二佢發覺左邊頸突然腫脹，所以即時入醫院割走少少淋巴組織做化驗，好彩至今未驗出有咩事，醫生話突然腫脹主因係休息時間唔夠喎。橄欖就一口咬定，一定係早前應付泛民嘅「拉布」戰累事，搞到佢夜一夜先至瞓覺喎！