政情：建制派苦戰過後擦餐勁
對於立法會卅幾個建制派議員嚟講，今年五月肯定係佢哋喺議會生涯中最難忘嘅一個月，事關喺審議議席出缺安排時，人民力量黃毓民同陳偉業合共提出一千三百幾項修正案，搞到佢哋淨係㩒掣否決修正案都㩒到手軟。為咗慶祝拉布戰落幕，一眾建制派議員除咗喺草案三讀通過嗰日開香檳外，佢哋尋日仲喺深水灣高爾夫球會聚餐，仲預先講明晚餐「只談風月，不講政治」喎。
邀埋局長 林健鋒埋單
尋日餐飯全數由經濟動力林健鋒（Jeffrey）埋單，Jeffrey話之前拉布拉到無啖好食，於是約埋食番餐好啲嘅補數。尋日出席嘅除咗建制派議員外，同建制派議員合作無間嘅政制及內地事務局局長譚志源、副局長黃靜文、財經事務及庫務局局長陳家強都有出席，佢哋大歎烤羊、烤豬，飲紅酒。