政情：中大股神反對貸款炒股
今年三月贏咗首個「實時真錢」大學聯校盃投資比賽總冠軍嘅中文大學三年級學生蕭輝（Simon），原來十幾歲就開始幫父母投資，期間經歷過金融海嘯蝕入肉，之後佢決定由基礎重新學習技術分析，又緊貼股票圖表趨勢，結果喺廿二歲就賺到人生第一個一百萬！佢年紀輕輕就對投資有一套睇法，就係深信技術分析嘅重要性。
今年廿四歲嘅Simon，小學時期已去咗新加坡讀書，三年前回流返港，入咗中大系統工程與工程管理學系，今次比賽中，佢以二萬元本金投資，兩個月後賺得一萬二千元奪冠。受到經營貿易生意嘅屋企人影響，Simon自細出入各大銀行，熟讀《窮爸爸富爸爸》等致富書籍，亦慢慢對股票市場產生濃厚興趣，佢坦言，細個篤股票機仲多過睇卡通片喎。
偏好太陽能板塊
不過，Simon話好唔支持同學用學生貸款炒股，認為投資唔係投機咁簡單，想有斬獲就要事前做足功課，千祈唔好為股票奉獻成副身家，最緊要係定個止蝕價保本。佢又提醒股民，依家股市正值波動期，新股最好揸幾個月見好就收，而佢就偏好有中央支持嘅太陽能技術股，貪佢發展夠強勢喎。