政情：貪曾愛邀功 網民鬧爆
距離執包袱之時不遠嘅貪曾，任內成事不足、敗事有餘，無咩功績不特止，本報揭發佢貪盡富豪海陸空款待，又濫用納稅人公帑豪華外訪，招致民望進一步插水。貪曾試過藉派糖挽民望，可惜返魂無術，於是尋日Cheap到連康文署轄下公眾泳池月票呢啲小恩小惠都要爭住邀功，喺特首辦社交網站專頁上強調係自己提出呢項「德政」，結果隨即被網民鬧爆，問佢知唔知醜！
康文署將於下月正式推行公眾泳池月票制度，以月票畀市民任游，本來都無咩特別。但康文署尋日公布後，貪曾唔夠三小時就喺社交網站facebook嘅特首辦專頁上硬銷呢單嘢，聲言呢個泳池月票制度係自己喺《施政報告》提出嘅，目標係減輕成日游水人士、特別長者嘅經濟負擔喎，講到好似係佢先諗到呢條好橋咁。其實早在十幾年前市政局年代已有人提出建議，只係遲遲都未推行。
一張$300 泳池無得賣
班網民一睇到貪曾叻唔切，就即時火都嚟埋，不停留言炮轟呢個月票計劃係垃圾。有人話，各區泳池收費唔同，一節時間由十七元至二十元不等，如果買咗月票，即係一個月最少游十七次先至回本，所以三百元成人月票根本唔會有太多人使用。至於月票計劃特別針對長者，同樣被網民反駁，話長者本身游水已經有半價優惠，基本上一百五十元長者月票計劃唔係好吸引。
月票另一無謂之處，係無得喺泳池即場買到，要另外走去康文署轄下四十二間指定體育館和康樂場地訂場處購買，走來走去都叫便利長者，貪曾同班庸官真係噏得就噏。其實大部分網民都好心水清，除咗鬧貪曾外，都提出好多建議，例如一律畀長者免費游水，又或者揀一啲非繁忙日子免費畀所有市民游水，咁咪連行政費都慳埋囉。不過，啲庸官執包袱在即，網民都係慳番啖口水好過喇。
話時話，貪曾咁鍾意貪小便宜，佢咁急要喺任內推行泳池月票計劃，唔通係要預先製造「延後利益」，方便自己卸任做番平民後，可以日日去公眾泳池游水？