中環出更：項明生為遊記發聲
「電玩達人」、Sony Computer Entertainment香港董事項明生（James），去旅行好講究深度探索，所以佢寫嘅遊記就成為好多旅遊愛好者嘅指路明燈。鑑於去年推出嘅個人遊記大受歡迎，James決定推出電子書版本，方便遊人接收最新嘅旅遊資訊外，出版商嘅收益同作者嘅版稅都會捐畀「小母牛」作慈善用途，真係一舉兩得。
更新資料 添加靚相
今次James推出嘅電子書，係好受歡迎嘅「十天敢動假期：墨西哥．古巴」，佢話呢本書去年面世後，原來好多人都係按照書中嘅建議去計劃旅遊路線，但書中某啲資料隨着時日呈現脫節嘅迹象，例如食宿費價格受經濟變動等。為咗令到旅遊著作內嘅資料與時並進，推出電子書就係一個合適嘅途徑。
新出嘅電子書除咗加上幾百張未曾喺印刷本曝光嘅靚相外，仲可以發聲添，不但有James嘅真人聲演，仲有西班牙語嘅讀音功能，讀者帶備呢本電子書去到拉美國家就唔怕雞同鴨講啦！