中環出更：潮青全家出動遊立會
添馬艦立法會新大樓自去年啟用以來吸引唔少團體參觀，曾任中央政策組非全職顧問嘅潮州商會青委主任陳光明（Johnny）都唔執輸，日前拉大隊踩入立法會，當中唔少潮青都係首次到訪，而且仲係一家大細出動添。其中青委副主任胡炎松（Anven）就帶埋大仔胡競麟（Kelvin）同細仔胡競文（Ivan）出席，佢哋拍埋似足三兄弟，Anven真係駐顏有術。
Anven話，趁兩個囝囝放暑假返港，畀佢哋了解吓港府架構。唔講唔知，Anven兩位公子都喺美國攻讀法律，Kelvin自小充滿正義感，對刑事學甚感興趣，立志做大狀，仲有一年就畢業。
胡炎松兩公子潛心學「法」
Ivan剛於經濟系畢業，但受哥哥影響，同樣迷上法律，正打算進修。Anven話，依家大學畢業生通街都係，最想兩個仔學番一門專業，提升競爭力喎。
Johnny話，以前因公職經常要出入立法會，至今依然關心政制發展，不時向政府提供意見。佢好鼓勵一班潮青多啲了解香港政策，但問到商會有無打算栽培年輕人入政界，佢就強調潮州商會係一個商會，唔好講政治喎！
靚女潮青副主任林月萍（Moray）、章曼琪（Katherine）都去湊熱鬧，身兼國際潮青秘書長嘅Moray笑言，潮州人之所以遍布世界各地，全因潮州人獨有嘅「海洋文化」，即係充滿冒險拚搏精神喎！為咗加深對家鄉嘅認識，Moray上月仲去咗汕頭大學修讀「潮州文化經濟研習班」，獲益良多。
卓妮