歐國盃：C朗父愛滿瀉

C朗頭兩場分組賽演出平平，多番失機，仲畀球迷高唱美斯個名喪寸佢冇料到，呢位球星將冤屈氣發洩喺荷蘭身上，全場作出11次射門，創造歐國盃單場個人最多射門紀錄，仲喺28分鐘同74分鐘取得士哥，協助葡萄牙反勝荷蘭晉級，佢仲有兩次射門中柱，如非欠運已大演帽子戲法！C朗連續五屆大賽有士哥，現時已為國家隊射入34球，超越前輩費高，喺葡萄牙史上射手榜排第三。

風騷啜手指 露示愛底衫

C朗今場射入第一球後表現興奮，喺一班隊友圍住之下風騷啜手指慶祝，原來係將入波獻畀啱啱度過兩歲生日嘅囝囝，當賽事結束後，C朗脫去球衣露出紅色內衣，上面寫上「孩子，爸爸愛你，祝你生日快樂！」C朗賽後受訪時表示：「今場球隊發揮確係冇得頂，絕對值得晉級！我成功射入兩粒，梗係非常開心啦，今日係我個仔生日，我要將呢兩球送畀佢！」C朗對荷蘭當選最佳球員，亦將榮譽送畀阿仔，真係錫到佢燶！

今仗於父親節舉行，C朗亦向傳媒表示：「我想信父親在天堂睇我比賽。」

請傳媒粉絲食檸檬

賽事結束之後，大批記者同球迷聚集喺場外等候雙方球星，當中最多人嗌嘅名始終都係人氣王C朗。不過，呢位葡萄牙英雄現身時表現得唔多熱情，只係對住人群邊行邊微笑，未有留低受訪，令在場傳媒同fans大感失望。