政情：詩姐妙問妙答真調皮

無回應丁權終結論

尋日詩姐同全國人大常委范徐麗泰一齊出席由各界婦女聯合協進會舉辦嘅回歸十五周年嘉年華，當記者問詩姐點睇發展局局長林鄭月娥話丁權要喺二○二九年終結嘅言論，佢先問記者有無時間聽佢解釋，但幾秒後就用「我無咁多時間解釋」為由急急腳走人，認真調皮。

尋日嘅活動完結後，記者上前問詩姐可唔可以講吓新界原居民丁權「五十年即變」嘅講法有無違反《基本法》，詩姐即時話呢個咁複雜嘅問題，唔係幾句就可以解釋清楚，跟住又話：「解釋畀你聽要半個鐘，你有無半個鐘呀？」

難得詩姐肯開金口，在場記者就答佢話有時間，但點知詩姐好快就自潑冷水話：「但我無半個鐘頭喎！」之後就喺工作人員陪同下極速閃人。