如果唔係馮煒光近日被踢爆申請做副局長搞到要退出民主黨，加上佢上星期又好忙要去台灣處理早前同人民力量黃毓民嘅肢體衝突案件，唔得閒覆電話淨係可以覆短訊，相信好多人都唔記得呢單瓜葛。
話說今年一月，馮黃二人喺台北觀摩台灣大選，喺台北國民黨中央黨部狹路相逢。毓民話當日見到馮煒光只係上前質問對方點解之前要喺facebook講佢個仔，重申自己無打過人，而當時民主黨同行人士隨即上前擋駕。不過馮煒光就聲稱被毓民打到塊面紅晒，仲話畀人打到連眼鏡都甩埋，即刻喺台灣驗傷備案。
台灣傳媒尋日引述目擊事件嘅國民黨人士表示，當日雙方初則口角，繼而推撞，仲目睹有一名男子眼鏡「被打落」，不過閉路電視就因為角度問題拍唔到實際情況，真相仍然懸而未解。馮煒光上星期五就係去咗台灣繼續處理案件，因毓民就尚未向台北地方檢察署解釋，檢察署已要求毓民盡速到台灣。但當時馮煒光聲稱被打後，民主黨兄弟紛紛出面力撐，唔知隨着馮煒光退黨，事態會唔會有新發展呢？