拉布戰令人民力量氣勢上升，人民力量尋日公布立法會直選各區布陣，最特別係新界西分拆兩隊出戰，一隊係陳偉業（大舊），另一隊就係麥業成，咁做法其實都幾冒險，因為出戰新西嘅激進派仲有社民連阿牛曾健成，如果阿牛同麥業成分別搶走大舊幾千票，大舊要入番立法會都會有幾大挑戰。
大舊○八年嗰屆係新界西最後一席入立法會，選情唔係好穩陣。今屆大舊首先要面對黨友麥業成分薄票源，亦要同阿牛爭票。阿牛上屆喺港島有成萬票，今屆就算空降新西，實力都不可忽視，不過大舊有唔少基本支持者，加上佢嘅參選名單有四個人，總之就係駐重兵力不容有失。
五區名單上，都見唔到維園阿哥任亮憲，原來佢無得選，可能佢自己都無癮，前日已宣布退出人民力量，聲稱辭退原因係工作繁忙喎。