政情：鬍鬚曾網誌學足CY腔
「屁股指揮腦袋」呢句說話，對應喺政治人物上真係萬試萬靈。好似財政司司長曾俊華咁樣，平時講嘢無乜組織，但可能佢知道自己七一後有機會跟梁振英（CY），留低繼續做財爺，最近連寫文用語都十足十CY，有晒層次分明。佢尋日喺網誌總結政績時話，過去一直用「六管齊下」方式增加土地供應，係唔錯嘅招數，又話未來可以循三個唔同方向增加土地。鬍鬚曾由講嘢無乜組織變成條理清晰，個個禮拜都寫嘅網誌尋日忽然積極晒。
土地問題係CY最關注嘅問題之一，鬍鬚曾尋日以「六管齊下增加房屋用地」為題，總結過去嘅土地政策，成篇文出現「土地」兩個字成廿四次咁多。鬍鬚曾話六招包括更改土地用途、重建、收地、維港以外填海、發展岩洞同埋重用舊石礦場。又話經過公眾諮詢後，大部分市民普遍都唔反對「六管齊下」，有信心短期內釋放一百五十公頃土地。除此之外，鬍鬚曾仲話現時有三十公頃工業用地，可以改為住宅用地。
唔講以為CY撰文
可能七一將至，臨近上司換人，鬍鬚曾急CY所急，講嘅嘢真係愈嚟愈似CY，唔單止議題啱嘴形，連用字都似到十足，佢話近年香港人經常表達「香港是我家」呢個訊息，所以土地供應對港人非常重要，只要喺土地政策方面「持之以恒」、「不斷優化」，就可以解決「社會經濟矛盾」。如果唔講畀人聽，仲以為係CY撰文。
鬍鬚曾做財爺無乜理財哲學，以往淨係睇住個庫房，都竟然可以因為亂派錢成為史上最廢財爺。CY話明佢嘅團隊一定要有政治能力，新老細講到咁明，今後又多咗個副司長做長遠開拓嘅工作，真係到咗要長進嘅時候喇。
其實鬍鬚曾咁樣總結，都係勇敢表現。因為直到現時為止，只係得發展局局長林鄭月娥走出嚟總結五年保育嘅成績，其他決策局就縮埋一舊扮隱形，唔敢做五年總結。
咁又係嘅，有啲決策局五年嚟都毫無建樹，政策推行搞到一鑊粥，失敗事迹數唔晒，成功事例就講唔出，唔通叫教育局局長孫明揚總結吓電子教科書有幾失敗咩？