中環出更：鄧鉅明賣錶又賣金
尋日沙田馬場舉行太子珠寶鐘錶精英盃，場內展示價值過百萬元嘅金飾，原來集團舊年將鎮金店收歸旗下，實行賣錶又賣金。集團主席及行政總裁鄧鉅明同夫人宣宏雁（Emily）風騷滿場飛，仲落力向貴賓推介金飾，前民政事務局常秘李麗娟（媽打）都有幫襯，買咗條金鏈畀未來新抱。
Emily着住名設計師鄭兆良設計嘅靚裙，親身演繹集團得獎作「金秋銀葉」，仲要兩條頸鏈打孖戴，艷壓全場。集團執行董事朱繼陶一身金色煲呔及西裝一樣咁閃，佢剛出席上海電影節返港，前兩晚又捱夜睇波，依然龍精虎猛。朱太鄧麗萍拖埋囝囝及新抱登場，原來朱太個妝係新抱化嘅。
鄧鉅明近日樓換樓，賣咗大坑怡晴軒後，上月以七千多萬元購入西貢大宅，單邊、靚景、花園加大泳池，仲有維港全景，佢話未必自住，會考慮長線投資。集團生意興旺，佢笑言冇計過身家漲咗幾多，最緊要身體健康同家庭幸福喎。講到集團幾時上市，佢就話唔急得，因為現時市場唔理性，要睇清楚方向先。
有傳候任特首梁振英暫時唔開放更多內地城市作個人遊，鄧鉅明就話好唔贊成，佢話香港以金融及旅遊業為主，個人遊長遠嚟講對香港有利。佢覺得政府應該開發多啲旅遊點疏導旅客，先至係上策。
媽打變咗「無膽匪類」
卓妮見媽打精神咗又fit咗，佢笑言變咗「無膽匪類」，事關上月做咗切膽手術，瘦咗四、五磅，不過因禍得福，幾年前買嘅衫又啱着。媽打話自己二十年內做過七次手術，最大得着係學識錫身，依家每日來回中環香港會同畢打街行八千步，最近仲買咗部拉筋機玩添。
卓妮