港府搞環保一事無成，煲呔曾固然貪威識食，不務正業，成為「氣候逃犯」，而佢嘅手下環境局局長邱騰華亦係渾渾噩噩，胡混度日，上任五年減廢回收零建樹。唉，官僚靠得住，豬乸會上樹，唔怪得香港愈來愈烏煙瘴氣喇！
係呢，綠色建築議會副主席黃錦星盛傳將會出任下屆政府環境局局長，佢對環保又有乜嘢見解呢？黃錦星日前接受本報獨家專訪，直指本港空氣污染及固體廢物處理問題迫在眉睫，係未來嘅施政重點，港人要有危機意識。佢仲話，比起日本、台北、首爾等周邊城市，香港人均垃圾量足足高出一半，當中近四成係廚餘，所以，做好廚餘回收及垃圾分類，將會係下屆政府嘅首要任務。
講就係咁講喇，但究竟點樣落實呢？黃錦星提議港府斥資喺全港屋苑設置廚餘專用垃圾桶，即使回收率只得五成，每日已經可以減少幾千噸垃圾，大大紓緩堆填區嘅壓力。佢仲拍心口咁話，只要源頭減廢做得好，備受爭議嘅擴建堆填區同興建焚化爐都可以放埋一邊，若果兩年後成效不彰，「炒咗局長」都未遲！
嗱，講得出就要做得到，咁先至叫做有承擔。係人都知，推動廚餘回收，唔只可以減少垃圾，紓緩堆填區壓力，仲可以廢物利用，將廚餘轉化為動物飼料及有機肥料，可以講係一舉數得，早就應該咁做喇。煲呔曾政府上台七年，講就天下無敵，做就無心無力，連廚餘回收都唔肯積極推動，簡直不知所謂。
話時話，港府搞環保毫無建樹，最叻就係講錢，收完膠袋稅，跟住就係廢電器及電子產品徵費、垃圾費等等。其實，徵費本來無可厚非，如果真係有助環保，相信市民唔會介意付出，問題係，當局收錢之後，環保仍然一塌糊塗，空氣仍然烏煙瘴氣，咁究竟收錢嚟做乜呢？
講到環保徵費，黃錦星認為，寓禁於徵係大勢所趨，無可避免，但最好辦法係引入有獎有罰機制，鼓勵港人改善不環保行為。冇錯嘞，台北、首爾等地推行環保之所以咁成功，皆因當地政府賞罰分明，冇人敢破壞規矩，唔知港府又做唔做得到呢？例如，煲呔曾居住嘅禮賓府，每月電費高達二十萬元，係三名司長官邸電費總和嘅二至三倍，更加係一般中產家庭嘅二百倍，分明係浪費電力，浪費資源，咁又該當何罪，如何懲罰吖？
歸根究柢，香港環保落後，皆因垃圾官僚為禍，煲呔曾其身不正，講乜都係假。好彩「氣候逃犯」時日無多，希望新政府能夠撥亂反正，還港人真正嘅藍天白雲，咁就一天都光晒咯！