立法會保安事務委員會主席涂謹申就呻話，佢哋每次開會都係保安局副局長黎棟國現身，反而身為局長嘅李少光就一次都無嚟過。阿涂就寸爆話，啲人問佢點睇黎棟國做下屆局長時，佢就回應話：「佢（黎棟國）都做咗三年（局長）啦！」暗寸李少光未卸任已經「退咗休」。
不過，阿涂擔心局長有鋪唔開會嘅癮，最怕將來黎棟國做咗局長後，輪到佢唔嚟開會喎。咁多局長之中，阿涂就大讚發展局局長林鄭月娥最勤力，因為林鄭唔止每次開會都出席，就連一啲小組會議都唔會放過，所以佢民望高真係有原因嘅。
其實除咗局長唔開會外，特首都係隱形一族，民建聯李慧琼就慨嘆話，淨係答問大會先見到特首，希望下屆政府增加答問大會次數咁話。