政情：小小明唔上廣州上電視
今時今日做父親一啲都唔簡單，好似「小明醫生」李家仁喺今日父親節都要開工，出席公開活動表演唱歌外，又要去電視台錄影，忙到無時間慶祝，好在佢囝囝小小明（Norman）學識煮一味「彩椒火腿扒炒烏冬」，前日喺電視節目中煮畀爸爸食，預先慶祝父親節。
現年十九歲嘅Norman，外形高大過爸爸，佢首次上電視亦表現得好淡定，同主持應對得體，示範煮餸時，揸刀切菜、拎起鑊鏟，一啲都唔會雞手鴨腳，原來事前練習咗成個星期。李家仁透露，由於個節目唔可以唱歌，所以就揀咗煮餸，囝囝為咗練習煮呢味炒烏冬，就令佢足足食咗一星期烏冬。
行醫多年嘅李家仁，因為工作忙，好少機會同囝囝食飯，平時好少慶祝父親節，但父子關係並無疏離。佢又大爆囝囝好識製造驚喜，話說去年父親節囝囝連「父親節快樂」都無句，點知佢返入房，就見到床頭有一張由囝囝送贈嘅父親節賀卡，佢感動到差啲喊出嚟喎，唔知今年會唔會又有驚喜呢？