中環出更：蜘蛛女愛上「大眼仔」
女士天生愛靚，綽號「蜘蛛女」嘅包山后鄭麗莎（Lisa）都唔例外，為咗輔助視力及令一雙眼眸更加動人，所以好鍾意佩戴有「大眼仔」之稱嘅彩色隱形眼鏡。
因應場合 不同配搭
Lisa話，佢十六歲已經有近視要佩戴有框眼鏡，目前家中經已累積多副形形色色嘅眼鏡。不過，自五、六年前，Lisa已開始選用大眼仔，覺得夠方便之餘，亦可因應環境而作出唔同配搭，例如出席莊重場合，會選用跟佢一頭栗子色秀髮相配嘅啡色，而黑色嘅大眼仔，又可以增強對比令雙目更烱烱有神，至於需要誇張效果，就會選用藍色。
對於好動嘅Lisa而言，戴眼鏡始終唔係太方便，所以佢都有考慮過接受激光矯視，然而佢嘅近視只有二百度，手術效果未必明顯，所以最後都放棄咗。