中環出更：大劉受壓疑現鬼剃頭
捲入澳門世紀巨貪案嘅華人置業主席劉鑾雄（大劉）都咪話唔愁，近日見親佢去灣仔富豪飯堂「福臨門」食飯時都係頭耷耷，臉容愁爆，好似心事重重。唔單止咁，卓妮尋日仲發現大劉個頭頂無咗忽頭髮，疑似係「鬼剃頭」，唔通係因為澳門單官司令到佢壓力大增？
尋日係父親節前夕，大劉依舊同家人到福臨門午膳。下午一時，大劉母親葉淑婉同胞妹劉玉珍先行到達，五分鐘後，佢嘅紅顏知己陳凱韻（甘比）與女兒亦到場。
偕家人午膳 保鏢緊張
之後輪到大劉細佬、人稱「細劉」嘅利福國際集團董事總經理劉鑾鴻現身，而大劉隨後亦抵達，現場保鏢大為緊張。
卓妮見大劉剪咗個新髮型，正當大劉匆匆行入福臨門之際，喺背後見佢頭頂竟然少咗忽頭髮，面積有成一個五蚊銀咁大，疑似係鬼剃頭，睇落都幾礙眼。乜嘢係鬼剃頭呢？其實係身體免疫能力出問題，淋巴免疫細胞攻擊自身嘅毛根令頭髮脫落，西醫話係壓力大所致，中醫就話係肝腎虧虛，血氣不暢，頭髮枯乾脫落。如果大劉真係「鬼剃頭」，莫非佢好大壓力？
其實大劉壓力大有乜出奇，事關佢捲入澳門前運輸工務司司長歐文龍巨貪案，華置名下嘅澳門「御海‧南灣」樓盤，更可能會被澳門政府收回土地，涉及二百億元嘅投資隨時付之一炬，就算唔係鬼剃頭，都頭痕痕爆啦！
卓妮