75X總站冇蓋 乘客日曬雨淋
巴士總站站頭上蓋欠奉，九巴被批未能照顧乘客所需！九巴75X線行走九龍城至大埔，位於九龍區的總站數月前遷至九龍城碼頭，但新站不設上蓋，令候車乘客被迫「好天曬落雨淋」。梁小姐坦言每次候車均深受其苦，「雖然之前個站都係冇蓋，但係隔籬仲有個簷篷可以遮下！依家呢度咁空曠，一係就行成條街去碼頭入面等車，但係有車開就未必趕得切追車！」
九巴發言人表示，九巴將向運輸署提交興建上蓋的計劃，一旦獲得批准，將會盡快展開有關工程。
「附近幾乎每個站頭都有瓦遮頭，唯獨係呢一個冇！其實咁基本嘅嘢，佢哋搬站之前應該諗到！」梁小姐指近日天氣愈趨炎熱，九巴應盡快亡羊補牢。