政情:梁志祥利誘鄉頭助選?

九月立法會選舉新界西議席爭奪好兇狠,勝負隨時只係幾千票之差,亦因為咁,令元朗六個鄉嘅鄉事票變得好吃香。據聞代表民建聯出選新界西嘅新界社團聯會(新社聯)會長梁志祥,近日積極邀請元朗八鄉鄉事委員會主席曾憲強夾隊出選,仲講明成事嘅話,會大力向政府推薦曾憲強做太平紳士喎。

據聞曾憲強係六鄉之中比較同新社聯啱傾外,更主要原因係梁志祥喺年初元朗區議會正、副主席選舉中同部分鄉事派炒咗大鑊,為咗唔想損失晒所有鄉事票,好自然就向曾憲強求助,加上曾憲強平時比較低調,仲好在無得失各方勢力,所以成為梁志祥物色嘅參選對象。

新界人一向極看重名譽同社會地位,睇番家陣元朗六鄉鄉委會主席,獲政府頒授勳銜嘅其實得曾憲強一個,佢已擁有一個榮譽勳章(MH),如果真係博到太平紳士嘅話,咁就威過威士忌喇,所以都咪話唔吸引。我哋曾經嘗試搵梁志祥求證,但未聯絡上。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報