政情:皇上早踎監有賺冇蝕

社民連立法會議員梁國雄(長毛),尋日成功透過司法覆核挑戰《立法會條例》中,限制被判監但未服刑人士不能參選嘅規定。雖然長毛最終仍然有可能要入獄,但對參選九月立法會就完全無影響。同樣因為衝擊論壇被判監嘅人民力量黃洋達(皇上),早前選擇提早入獄服刑,如今長毛司法覆核成功,有網民就話戥皇上坐得唔抵喎。

我哋尋日搵過皇上,佢叫大家千萬唔好覺得唔抵,相反長毛挑戰成功,佢都好開心。佢重申,選擇坐監三星期,係因為如果唔坐嘅話,好多計劃同部署都實踐唔到,反而長毛因為身經百戰,參選勝出難度較低,所以自由度較大,權衡利害之下,最終決定入獄。

皇上又笑言,月底會有兩場「棟篤笑」表演,如果唔係坐咗監嘅話,可能連場地都訂唔切,區又落唔到,打亂晒所有部署。其實計計吓,皇上坐監真係有賺無蝕,淨係睇有幾百人接佢出獄,曝光率大增就已經抵番晒啦,話晒佢依家正積極考慮參選九龍東喎。

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報