中環出更：霍震寰 霍震宇同場不相逢
已故全國政協副主席霍英東家族嘅爭產案，要到七月底才再開庭審理，對簿公堂嘅霍震寰同霍震宇兩兄弟，咁啱尋日不約而同出席位於中環大會堂舉行嘅鄧小平展覽開幕禮，但係震寰企喺台上，震宇就游走於台下，由始至終都無機會碰頭走埋一齊。
究竟佢哋當睇唔到對方吖，抑或真係無緣對面不相逢呢？
卓妮見震宇好重視呢個展覽會，佢喺開幕前半個鐘就率先到場先睹為快。對於備受矚目嘅爭產官司，震宇就話無可奉告，但對於近日好熱門嘅港元聯匯應否脫鈎問題，佢就猛話貨幣政策好複雜，但隨着時代不斷改變，無事物係一成不變嘅。
問震宇點樣睇依家疲弱嘅環球經濟，震宇就好樂觀咁將經濟比喻為感冒，話冇乜大不了喎。
兄稱與弟有偈傾
至於佢二哥震寰，就喺開幕儀式前一刻到場擔任剪綵嘉賓，當佢走下主禮台得悉胞弟震宇都同場時，震宇已經悄然消失，兩兄弟無機會碰頭。
震寰就隨即話，佢哋兩兄弟不時都有聯絡，尋日朝早先至喺公司見過面喎。不過，當震寰聽到爭產官司一事時，就以觀賞展覽圖片為由封嘴唔講嘢。
究竟邊幅圖片令震寰咁專心去欣賞呢？原來係一張攝於二十幾年前嘅相，相中人有佢同兄長震霆及佢先父霍英東及已故國家領導人鄧小平合照，但就獨欠震宇，當中可能睇到一啲玄機都未定。
卓妮