九巴模型拍賣 出爾反爾
黃先生為巴士模型發燒友，早前以最高價中標投得一部九巴限量版模型，並獲九巴以電郵通知，着其於限期內親往指定地址購買中標模型。不過，黃於限期前卻接獲來電，指「模型送咗畀Roadshow喇」，並強調「九巴保留權利，不一定出售物品予出價最高者或任何投標者」，令黃大感不滿。
九巴發言人承認，招標期間存貨系統資料出錯，有關巴士型號已沒有存貨，強調已通知投標者該項網上競投項目經已取消。發言人重申，有關模型並無贈予任何機構，並會按有關條款及細則，成功競投者需經核實程序，須先付款、後收貨，惟因黃先生尚未付款，競投活動亦已取消，故未有完成整個交易程序。
「成個拍賣完成咗，出埋電郵叫我去買，但九巴依家又話一早取消咗，咁即係呃人啫！」黃先生直指競投活動價高者得，不滿九巴「先付款、後收貨」之說。