好咯好咯，謝天謝地謝祖先，今次真係還得神落。食物及衞生局局長周一嶽終於表明心迹，講清講楚唔會留任下屆政府。你知啦，周一嶽又名周一鑊，由佢雞手鴨腳處理香港人嘅生老病死，每周爆一鑊好鬼死慘o架。家陣大江東去浪淘盡，周一鑊摘下頭殼一頂烏紗帽，如果燒炮仗唔係犯法行為，相信已經燒得遍地開花，慶祝小市民舒一口烏氣！
周局長之所以唔再做局長，到底係自己劈炮呢，定係不受重用被移動？一鑊先生顧左右而言他，服務市民不一定要留於政府咁話喎。被問到下任特首梁振英有冇挽留，周一嶽話不評論，淨係講應該給予梁振英足夠空間選擇自己班底，佢多年來都冇自己推薦自己。
對於自己是否被移動就唔肯講，不過有一件事周一嶽講得好大膽。身為醫生嘅佢認為，內地失明民運人士李旺陽死因有兩大疑點，周一嶽成為特區政府首名在任官員公開評論呢一單離奇怪事。
香港人評論李旺陽死因當然冇問題啦，偏偏周局長仍然在任，點都要做多十幾日先至正式退位，作為一個中央委任嘅高官，咁樣提出兩大疑點有冇問題呢？計功夫茶話齋，件事都未查清查楚，真相仲未水落石出，要講都等到不在其位先至講，以免引起官老爺胡說八道嘅誤會嘛。
任內頻頻失職嘅周一鑊唔會留任下屆政府，除咗小市民覺得可喜可賀之外，佢自己都應該感到老懷安慰。點解咁講呢？大家睇睇長期民望低殘嘅政務司司長林瑞麟，一話七月一日政府換屆之後去英國讀神學啫，民望馬上好似回光返照咁樣反彈，大家讚佢知所進退。周局長民望距離貼地唔係相差好遠o架咋，相信表明心迹之後一樣會得到民望反彈嘅安慰獎。
講到任內頻頻失職，不得不提醫療系統五勞七傷。醫生護士長期人手不足，間接導致醫療失誤死得人多，邊個造成o架？雙非孕婦逼爆產房，本地媽媽怨聲載道演變為日益尖銳嘅中港矛盾，互相謾罵蝗蟲與狗，如果唔係梁振英拍心口一句「雙非孕婦零配額」，周一鑊唔知仲要渾渾噩噩到幾時。
盛傳接替周局長嘅人選係曾經擔任過醫管局高層嘅高永文，假如此言屬實，功夫茶有必要向未來局長提出一大諍言。嗱嗱嗱，高永文，麻煩閣下施展渾身解數收拾舊山河，亦即係收拾爛攤子，莫講話醫療系統必須大刀闊斧改革，不斷困擾孝子賢孫嘅骨灰龕位問題都要徹底解決。食衞局其實真係好重要o架，食要食得安心，死要死得安魂，點可以由一個掛住上台表演唔做正經事嘅走音歌王做局長o架！