貪曾貪腐醜聞纏身，全身icon淨得個「貪」字，儘管佢日日招搖過市上教堂「懺悔」，佢嘅「政治人格」睇怕都係破產！
貪曾一味面皮夠厚，唔怕已化身過街老鼠，無視教育界怕佢教壞青少年玷污教壇，死都要出席教學頒獎禮，一個人無恥至極則勇，至賤則無敵！信焉！
講開貪曾，其實喺佢身上都學到唔少做人道理；有資深傳媒人話佢不知取捨，終致「爛尾」！鬼咩！一個人舔到咁盡，財迷心竅，權充上腦，跌咗落水，死都仲要攬住二十斤黃金、三百幾隻名錶，咁嘅貪相，就真係神仙都冇得救！
貪曾話要「打好份工」，實情喺「無王管」下豪花納稅人錢供佢吃喝玩樂，住總統套房；遐想佢吹住口哨接任特首，又唔知道「水與魚」嘅關係，「水」係中央，「魚」係佢，水冇咗魚依然係水，魚冇咗水就瓜得，貪曾利欲攻心，不知分寸，不識抬舉，做咗特首仍要英國佬嘅「爵士」銜，呢啲就叫做唔識大體咯！一個人唔知取捨，到頭來總統美夢一場空！現代版「八十天皇帝夢」想不到由佢主演！
從貪曾身上，老朽特別佩服太史公司馬遷，皆因佢用上半身諗嘢，更洞悉人性，司馬遷除了講「天下熙熙，皆為利來；天下攘攘，皆為利往」，仲話「夫千乘之王，萬家之侯，百室之君，尚猶患貪，何況匹夫編戶之民乎！」看官，做人要知所取捨，唔好貪得無厭，認住煲呔個貪icon，深明得失、取捨得宜，才可以做個風騷快樂人！