政情：朱曦妙喻暗撐許曉暉
台灣駐港機構台北經濟文化辦事處處長朱曦，眨吓眼派駐香港已經半年，佢尋日就相約傳媒聚會講感受。適逢香港政府換屆及社會上嘅爭議，朱曦對於好多敏感問題都巧妙迴避，但講到盛傳會出任文化局局長嘅民政事務局副局長許曉暉時，朱曦就話，問責官員主要負責政策方向，未必要讀嗰行、熟嗰行，好似做總統一樣，未聽過邊間大學有得讀「總統系」喎，擺明暗撐被批評冇文化背景嘅許曉暉啦！
朱曦又直言，台港官員互動好少，關係談不上密切，雙方仍有好大空間促進彼此嘅了解。好似佢來港後未曾同候任特首梁振英見過面，所以希望七月新政府上場後，可以同港府保持密切合作關係。
光華新聞文化中心主任張曼娟尋日都一齊現身，做主持嘅佢經常叫朱曦做「果汁先生」（Mr. Juice）。原來朱曦嘅國語發音同Juice差唔多，所以同事就幫佢改咗呢個花名，尋日個聚會更索性叫「Juice Party」添！