各黨派陸續定出九月立法會選舉嘅參選名單，尋日建制派傳來消息，話外號「Dream Bear」嘅全國政協委員劉夢熊亦都有意參選港島區，但不獲北京認同，仲話佢同社民連成員「阿牛」曾健成有秘密交易添。
劉夢熊接受本報查詢時直認有意參選，但未揀定去邊區，呢個月底就會拍板。佢又話有好多人「勸進」佢，但就無聽到有人勸退，質疑放料者係想「毒死」佢喎。
劉夢熊一向有捐錢畀阿牛所屬嘅保釣行動委員會，仲不時一齊就保釣問題遊行示威同開記者會，有傳阿牛今屆決定離開港島老巢，空降新界西參選，將港島區讓路畀劉夢熊。消息又話北京對佢參選好有保留，認為佢一定唔夠票當選，但係就會分薄其他建制派票源。
劉夢熊話，其實佢好早就講過有意參選立法會，最近亦有好多人「勸進」佢，包括早前佢幫過手反對村屋僭建登記制度嘅元朗鄉事派，依家佢仲未決定會去港島、新界西或新界東。佢強調，自己同阿牛只曾就保釣問題合作，喺本港事務上，佢同發動「五區公投」嘅反對派絕對無偈傾，否認秘密交易之說。