政情：白鴿公文袋疑枱底交易
九月立法會選舉新界西選情立立亂，原本係新界西立法會議員嘅民主黨主席何俊仁（鐵頭仁）早前宣布放棄直選，轉戰超級區議會議席，仲懶民主咁話開放畀黨員報名參選。不過，所謂嘅「開放」，可能都係假象，原來白鴿黨私底下同公民黨（公文袋）傾掂數，鐵頭仁已鐵定出戰超級議席，而佢新界西張名單就會讓畀公文袋郭家麒參選，估唔到白鴿黨衰到益外人都唔益自己嘅黨友。
新界西多咗個位，原本無聲無氣嘅公文袋忽然積極起嚟，佢哋嘅黨員郭家麒尋日就公開話會出選新界西，分分鐘仲係排隊頭，前黨魁余若薇就排第二抬轎，認真離奇。過往白鴿黨喺新界西都會派三隊出選，今年多咗一個議席，佢哋反而減少一隊。加上之前講話該黨尹兆堅選超級議席，突然間又臨時變陣，由鐵頭仁頂上，尹兆堅就「消失」無得選，好難唔令人懷疑白鴿黨同公文袋可能有「枱底交易」。
不過，公文袋就話，其實佢哋一向都想喺新界西攞到議席，又話○八年都係差少少就贏到，所以希望嚟緊可以喺新界西攞到兩席咁話。郭家麒都承認佢哋係兵行險着，又話咁嘅部署就係要話畀人知好危險，等啲過往無出嚟投票嘅人今年出嚟投票喎。其實白鴿黨一直都無同民協商討協調出戰超級區會事宜，依家鐵定由鐵頭仁同涂謹申出戰，分分鐘民協都係蒙在鼓裏。
四乳鴿想做官認衰補鑊
白鴿黨老鴿瞞住黨員同公文袋傾掂數，下面四名乳鴿又被我哋踢爆「欺上」，偷偷哋走去申請做下屆政府副局長同政治助理，確係「上樑不正下樑歪」。
四隻乳鴿尋日就出嚟公開認衰，承認喺無知會個黨嘅情況下申請職位，但解釋只係想測試遴選程序喎。雖然申請無晒音訊，但萬一新政府獲聘佢哋嘅話，問心嗰句，佢哋又係咪抵擋得住高達十萬元嘅高薪誘惑呢？
除此之外，聽聞白鴿黨南區區議員馮煒光都有應徵做副局長或政助，但佢尋日無一齊出嚟回應事件，亦無公開否認有應徵做副局長或政助，莫非佢係嚟真嘅？擔心見光死？事件實在惹人遐想喇。