中環出更：空姐母女當輔警 剛柔並重
空姐形象高貴大方，係唔少女士夢寐以求嘅工作，而卓妮就發現國泰航空有一對「母女檔」空姐，做正職之餘，更不約而同投身輔警，將服務對象範圍擴大到全港市民。身兼機艙服務部培訓導師及榮譽高級警司嘅媽媽朱小燕，面對飛機上乘客爭執時處變不驚；囡囡易小琳就話做空姐同輔警給予佢雙倍滿足感，仲話希望有朝一日追到媽咪成就喎。
一人飾兩角制止乘客爭吵
由空姐轉職地勤再做到依家呢個位，朱小燕已喺呢行打滾咗四十年，但原來佢十七歲開始已經擔任輔警。朱小燕笑笑口話，雖然輔警工作帶畀佢好大滿足感，但其實佢志願係做個靚空姐，終於喺十八歲完成夢想，自此一人擔當輔警同空姐兩個角色。試過有次喺機上遇上兩位男士因為座位問題嗌交，佢就以輔警嘅嚴肅姿態及空姐溫柔口脗成功處理事件。
正當朱小燕四年前喺輔警界退休，成為榮譽高級警司之際，佢囡囡易小琳又行番媽咪條舊路，成為剛柔並重嘅「空姐輔警」。易小琳話，空姐同輔警都要經常面對群眾，好注重溝通技巧，所以兩份工學到嘅嘢其實係互通嘅，亦有助佢處理一啲意圖謀殺及自殺嘅案件。佢又話，好希望可以好似媽咪咁繼續喺航空服務同輔警界幹一番事業。