中環出更：林筱魯Talk騷 浙青Band友助興
候任特首梁振英（CY）快將上任，普羅大眾對佢嘅房屋政策抱有極大期望。有份幫CY寫政綱嘅資深城市規劃師林筱魯（Andrew），早前就應浙江省同鄉會聯合會（浙聯）青年委員會邀請，現身灣仔會所餐廳「浙江軒」講Talk，解構香港未來規劃及土地發展嘅方向。原來Andrew都係浙江人，難怪曾任金銀業貿易場理事長嘅浙聯會長李德麟都撐場。
香港租金高漲、市民置業困難，如何走出困局？同CY相識廿幾年嘅Andrew話，香港地上無椰子，地下無石油，靠嘅係人才及制度，大家應該一齊發夢，相信可以創造未來。
新思維解決市區發展
Andrew又話，要以新思維解決市區高密度發展問題，又提醒流動人口對土地規劃將帶來衝擊，政策應有所準備喎。
講座完後仲有大驚喜，就係由浙青兄弟姊妺夾Band助興。李德麟囝囝、大唐金融集團高級副總裁李惟宏變身鼓手，常務副主席麥超傑就彈低音結他，另一名常務副主席鄒漢章同一班男女靚聲王齊伴唱。
呢個啱啱組班嘅樂隊叫「浙聯新聲」，成員有十三人，成立因由係最近幾個浙滬社團準備舉辦聯誼活動，節目包括獻技比賽。浙聯於是打聽會內有冇識玩樂器嘅人，一問之下，原來人才濟濟，House Band於焉成立。
卓妮