墮落呀墮落，香港確係愈來愈墮落！
功夫茶點解咁講呢？無他嘅，有人不知廉恥吖嘛，而且呢個人位高權重，一言一行都足以影響下一代。即係咁，貪腐成性嘅曾蔭權居然堅持出席「行政長官卓越教學獎頒獎典禮」，你話係咪有辱斯文先？
頒獎典禮今日下午三時於添馬艦政府總部西翼二樓會議廳舉行，其他主禮嘉賓包括教育局局長孫明揚以及教育局常任秘書長謝凌潔貞等等。如果貪曾仲有少少良知，唔引咎辭職都應該引咎缺席啦，避免以身作則教壞細路，冇可能由一個舔盡便宜嘅「香港第一貪官」去頒發教學獎。
喂，唔好唔記得喎，教育界組織早就大聲疾呼，要求醜聞纏身嘅曾蔭權唔好出席任何教育活動。不久前，會員包括大學教授、中小學校長同老師等等嘅教育評議會，高調召開記者會批評貪曾在任七年對教育發展毫無建樹。學似該會執行委員蔡國光話齋，學校向來重視道德培養，曾蔭權未能潔身自愛，經歷連串貪腐醜聞仍未真心悔改，實為年輕人壞榜樣。蔡國光建議，教育局課程發展處將曾蔭權違法失德行為設定為德育教材，畀學生引以為鑑。
另一執行委員曹啟樂認為，曾蔭權不應再出席教育界活動抽水攞彩，應該承認係戴罪之身，公開聲明避席行政長官卓越教學獎頒獎典禮，以免玷污教育界形象。
話時話，煲呔嘅「厚臉神功」睇怕都練到爐火純青，否則冇可能不知廉恥到咁嘅程度。輿論不滿佢貪遍海陸空咩，佢口口聲聲「問心無愧」，審計署認定佢行為不恰當咩，佢表演一套「扮哭無淚」，家陣全城喊打要求佢引咎辭職，佢賴死唔走都不特止，居然仲有面目向教育工作者頒發教學獎。呢一種咁頑強嘅頂硬上鬥志，地球之上相信只有打不死嘅曱甴先至有資格相提並論。
曹啟樂講過，教育評議會向各大、中、小學及幼稚園發放「反貪曾」通告，由於不少老師、家長同學生都對曾蔭權逃避問責嘅態度極為反感，如果貪曾短時間之內未能回應教育界訴求，不排除將行動升級。計功夫茶話齋，貪曾頒發教學獎，有辱斯文太乖張，如果教育評議會真係將行動升級，一定會得到極大支持。
距離七月一日政府換屆仲有唔夠二十日，一則以喜，一則以悲。喜嘅當然係貪曾即將夠鐘執包袱啦，悲嘅係時間應該唔夠將佢趕落台。你知啦，自己走同被趕走係兩件事。
點都好啦，麻煩教育工作者更加落力教好下一代，萬一有學生話「我的志願是特首」，一定唔容許佢嘅目的係貪得無厭！