衞生署署長林秉恩退休喇！唔怪得不久前衞生署筵開二十多席歡送，喺禽流感殺埋身時杯上杯落，日前又輪到醫療輔助隊大搞一場擦鞋表演，二千人淋雨步操，搞到天怒人怨！
講真，如果林秉恩真係做好份工，好應該為佢榮休而搞吓氣氛！之不過佢掌衞生署近九年，劣迹斑斑，尤其○九年歐化藥廠生產嘅痛風藥「別嘌醇」被揭受到毛霉菌污染，導致最少八名癌症病人死亡。此「劣藥事故」明明係佢監管不力，佢竟然想卸責，聲稱：「冇嘢係完全消毒，如果你檢查身上嘅霉菌，可能多過啲藥！」嘩！語氣很牛，意義很雷，聽完很囧！
老朽才俄然驚覺：香港高官內地化！文化互相交流，潛移默化原來未必係好事！
真係多得本報編輯，輯了「林秉恩失誤事件簿」，用「罄竹難書」形容之庶幾近之！老朽留意到，○三至○六年，林秉恩以《不良醫藥廣告條例》法例，向《東方日報》及《太陽報》發出警告信，甚至提出控告！哈！正義得佢啊！之不過，同樣廣告在其他報章刊登時，衞生署卻視而不見，林秉恩被議員批評選擇性執法。
老朽但知為官者，處事不能秉公辦理，加上選擇性執法、怠惰、渙散、混濁，不要說成為一個稱職的好官，不搞到一鑊泡，少啲犯錯，老百姓已要感激酬神啦！林秉恩走得快，市民好世界！新官但願勿再步其後塵，一味官僚牛氣，切要公正執法，守好關，市民及病人的健康才會有保障。