政情：工聯會要捱領匯貴租
領匯近年喺屬下商場大幅加租吸血，令小商戶叫苦連天，就連工聯會都受害。身兼工聯會權益委員會副主任嘅立法會議員葉偉明就話，領匯咁加租法，真係好離譜。
工聯會喺將軍澳海悅豪園商場有個千幾二千呎嘅地區服務處兼業餘進修中心，部署嚟緊立法會選舉出戰新界東嘅葉偉明早前就喺中心劃咗個位做地區辦事處。佢話呢個商場一直係由信和置業管理嘅，今年一月就被領匯收購咗，中心咁啱上個月租約期滿，點知領匯一加就加差唔多三成先肯續約，「以前信和都有加，但無加咁多，領匯真係加得勁！」
葉偉明話，喺將軍澳真係好難搵地方，大商場未必租畀呢類進修中心，即使肯租，租金又貴，附近啲屋邨又無位，所以惟有焗住繼續租番依家個地方。
不過佢強調，佢個辦事處雖然喺中心入面，但其實係唔使交租嘅，即係工聯會交埋佢嗰份喇。