政情：霍震霆落力開「奧運會」
體育、演藝、文化及出版界立法會議員霍震霆（Timothy）喺立法會出席率低，不過身兼香港體育協會暨奧林匹克委員會會長嘅佢，對奧運嘅工作就好投入。佢風塵僕僕，上個月先去完倫敦開會，最近又去咗巴西，原來係開會傾二○一六年嘅奧運。佢去開「奧運會」，出席率可能高過開立法會。
影相先記得除「黑超」
Timothy尋日出席第四屆全港運動會開展禮，戴住黑超嘅佢有啲疲態，原來佢尋日先喺巴西返嚟，落機冇幾耐就趕去九龍公園出席兩年一度嘅全運會宣傳活動，仲好有耐性咁同啲體育界人士、運動員等握手、影相。唔知係咪攰得滯，佢影相時先突然醒起要除咗副「黑超」，戴番普通眼鏡。
Timothy去巴西搞啲咩？佢就話巴西里約熱內盧奧運四年後舉辦，所以要去出席籌委會會議，仲足足去咗成個星期咁多。港協暨奧委會會長嘅地位都唔低，唔知佢喺巴西，有無好似貪曾咁住總統套房呢？