政情：長毛掟貪曾或成絕響
社民連立法會議員梁國雄（長毛）早前因為衝擊替補機制論壇被判入獄兩個月，之後佢向高等法院提出司法覆核，話有刑期在身唔可以參加立法會選舉嘅做法違反《基本法》。高院司法覆核結果會喺今個禮拜四揭盅，適逢同日係煲呔曾任內最後一次出席立法會答問大會，如果長毛到時選擇即時入獄，佢可能會錯失最後一次掟煲呔曾嘅機會。
示威常客長毛平時會趁答問大會舉行期間大鬧同攞道具怒掟煲呔曾，搞到幾乎每次都會畀立法會主席曾鈺成趕出議事廳。
長毛試過喺今年三月向坐富商私人飛機外遊嘅貪曾掟吹氣飛機，舊年又試過向佢怒掟過糖同蕉形毛公仔，狠斥佢喺施政報告唔肯向市民派糖。
長毛尋日話，如果到時法庭判佢敗訴，佢會要求即時入獄，以便等佢趕得切出獄報名參加九月立法會選舉。雖然長毛口就話唔擔心司法覆核結果，但就話希望到時有機會聽到煲呔曾嘅道歉騷。願意瀟灑入獄嘅長毛，心裏面都係記掛住煲呔曾。