中環出更：馬偉明狂踩貪曾
尋日理工大學喺洲際酒店舉行時裝展，大騷紡織及製衣學系畢業生新鮮出爐嘅作品，唔少時尚達人都有嚟湊熱鬧。卓妮見到時裝設計師協會副會長馬偉明（Walter），問佢點睇業界前景，佢慨嘆香港近年來都冇出色嘅設計師誕生，點解？Walter笑言：「曾蔭權本身都唔鍾意時裝，你睇吓曾太嘅衣着就知啦！」
陳柏熹預告明年時裝風
Walter話近年舖租咁貴，想創業真係難。要推動創意藝術，政府嘅角色好重要，但曾蔭權自上任以來，完全忽略本土文化發展，好似活化建築作藝術用途咁，做極都冇乜成效。佢對即將成立嘅文化局寄予厚望，最想設立創業基金畀年輕人發揮所長。
Moiselle太子爺兼形象總監陳柏熹（Harris）擔任評判，佢身穿Dior反領白恤衫，原來係方便打煲呔。佢透露，月底將飛巴黎出席公司首次喺當地嘅展覽，展出明年春裝。講到買衫，Harris好支持環保，恤衫唔着到變黃都唔會掉。正因為咁，佢買衫通常揀簡單款，仲要質料耐用，咪長着長有囉！
Harris話，明年趨勢會走自然風，設計將以鬆身、舒適為主。佢話時裝同生活息息相關，都市人壓力大，所以要着休閒服調劑吓。講番個時裝展，設計大師鄧達智大讚香港學生水準超晒班，內地望塵莫及喎！
卓妮