中環出更：輕鬆林D9 等去讀神學
政務司司長林瑞麟（林D9）上個月正式宣布唔會留任下屆政府，卸任後會去英國牛津修讀一年制神學文憑課程。佢尋日喺新政府總部廿五樓舉行告別酒會，宴請全體立法會議員、各區區議會主席同傳媒出席。林D9話一年後會返港從事傳道工作，但就未必會再從事公職嘞。
笑言太太負責洗衫煮飯
唔知係唔係即將離開官場，「無官一身輕」嘅林D9睇嚟好輕鬆，佢話七一後會先同太太飛去英國搵屋，跟住會短暫返香港處理私事，之後再返英國等開學。林D9話政治問責官員最多只會做兩屆，多過兩屆係「絕無僅有」。林D9之後有啲感慨咁話辛苦多年終於供完兩個女讀書，依家輪到自己供番自己讀書，又笑住話同佢一齊去嘅太太會負責洗衫煮飯。林瑞麟喺政壇係出咗名嘅愛妻號，卸任後同太太去英國，真係快活過神仙。
林D9最後又對在場人士分享自己三十幾年嘅從政心得，話政治上嘅風雨總會過去（All things come to past），又話「出外靠朋友」，朋友對從政者嚟講係好重要㗎喎。
卓妮