衞生署署長林秉恩退休，如果你係擦鞋仔，你會點做呢？簡單啲講，識做。複雜啲講，有咁大做到咁大，總之做到上司有顏有面眉開眼笑！
呢嗱嗱嗱，擦鞋仔又出動嘞，繼上次衞生署筵開二十幾席歡送林秉恩之後，輪到醫療輔助隊大搞一場擦鞋表演。
未講醫療輔助隊點樣擦鞋之前，功夫茶同大家溫故知新。衞生署歡送林秉恩，時間係晚上八時，大角咀奧海城一間中式酒樓觥籌交錯。本來都冇乜嘢嘅，尋歡作樂人之常情，最衰係當晚署方高層空群而出，而同一時間咯喎，瑪嘉烈醫院通知衞生署，有一個長住廣州而有香港居留權嘅兩歲男童確診感染禽流感H5N1病毒。禽流感呢家嘢，可大可小吖嘛，既然醫院通知衞生署，署方係咪應該火速通傳，等全世界提高警惕知所戒備呀？哈，衞生署居然延至晚上十一時三十五分，先至透過政府新聞處發布消息，中間存在三個半鐘頭空檔。唔使審啦，署方梗係忙於擦鞋唔得閒公告周知。
好嘞，今次醫療輔助隊又搞邊科呢？身為總監嘅林秉恩，預定下午出席「部隊訓練日檢閱會操」擔任主禮嘉賓，隊方為咗迎合呢一位重量級嘉賓，上午做咗一系列好唔尋常嘅動作。動作包括，至少二千人浩浩蕩蕩參加步操比賽，唔少隊員聲稱受到上級無形壓力而「被迫自願」出席，有分區隊員仲要提早一小時到場，一毫子津貼都冇。
更加唔尋常嘅動作就係，天文台清晨五時幾發出雷暴警告，生效時間一直延長至中午十二時幾，大雨之下嘅步操比賽冇停過。亦即係話，隊員喺惡劣天氣之下仍然有必要施展渾身解數完成賽事。各位大概要問，點解咁勇咁冒險呀？唔怕天打雷劈咩？冇錯嘞，問得好。答案盡在不言中，醫療輔助隊唔想掃林秉恩雅興吖嘛，所以將上午要做嘅事全部做晒，唔腰斬，唔延期，咁咪冇嘢會騷擾到下午嘅盛事囉，只不過要付上隊員辛辛苦苦淋到變咗落湯雞嘅代價。
計功夫茶話齋，林秉恩早抖咪早抖囉，擦鞋仔冇必要勞民傷財啫，更加冇必要獻醜。喂，雷暴警告呀，唔係講玩o架，咁都要勉強繼續比賽，一個唔好彩有人五雷轟頂點算呀？再講吖，林秉恩任內問題多多，防疫固然經常失職，連藥物管理都甩皮甩骨。審計署發表過報告，怒批衞生署監管藥物不力，立法會跟進嘅結果就係，一致決定譴責林秉恩。一個受過譴責嘅署長，擦乜鬼嘢鞋吖，浪費生命實在太無聊。
點都好啦，擦鞋仔獻醜完畢，望只望下任署長盡忠職守，唔好再害人害己食錯藥呀！