勢估唔到貪曾的最後剩餘價值，竟然係政壇嘅一面照妖鏡！
話說立法會內務委員會日前上演群妖亂舞護貪曾「後宮戲」，呢頭鬧爆貪曾，嗰頭投票護曾，結果，民主黨提出嘅三項反貪曾動議，連傾都唔使傾即時遭否決，非常醜陋！
從事政治的，老朽自是不會要求其「達於情性之理，通於物類之變」，「完人」難求，然望之有幾分人樣，也不太過吧？做變色龍變到令人眼花作嘔，未免過分！自由黨主席劉健儀身兼內會主席完全當市民失憶兼眼盲；不久前才鬧爆貪曾醜行「天理不容」，日前主持會議卻處處偏幫貪曾；更離罩嘅係，上周六又喺銅鑼灣鬧市擺檔做騷，話要收集市民對貪曾下台嘅意見！
阿姐，通過大眾傳媒，係人都知貪曾成隻過街老鼠，要求佢下台嘅民意清晰過用天文望遠鏡透視，仲要收集民意？擺到明十足係政治抽水啦！老朽諗起你獨自悶啃快餐店嘅焗豬扒飯而「高風亮節」唔出席「大和解飯局」，當堂黃膽水標升，想嘔！
講到尾，一切拙劣嘅政治騷，無非想蒙騙選民，老朽想起俄國作家、諾貝爾文學獎得主帕斯捷爾納克講過：「人來到世上是要生活，而不是為生活做準備。生活本身，生活現象，生活的恩賜，都十分誘人卻又非同小可。既然如此，幹嗎要用幼稚杜撰出來的蹩腳喜劇去冒充生活呢？」吃焗豬扒飯也做騷嘅劉健儀能領悟嗎？